Bilang bahagi ng pagdiriwang ng ika-48 Anibersaryo ng CAGELCO II, matagumpay na isinagawa noong Setyembre 11, 2026, sa CAGELCO II Multi-Purpose Hall, Aparri, Cagayan, ang “Dugong Alay, Dugtong Buhay” Blood Donation Drive sa pakikipagtulungan ng CAGELCO II Labor-Management Committee (LMC).

Sa ikawalong taon, katuwang pa rin ang Philippine Red Cross–Cagayan Chapter, 57 bags ng dugo ang nalikom sa muling pakikiisa ng mga boluntaryong donor na pinangunahan ng mga empleyado ng CAGELCO II, mga Member-Consumer-Owners (MCOs), at mga kinatawan mula sa iba’t ibang ahensya at organisasyon, kabilang ang Philippine Coast Guard, BJMP–Aparri, 15th Infantry Battalion, Charles W. Selby Memorial Hospital, LGU Maura, Metrobank, Maghari Security Agency, Samahan ng Cagayan Valley Incorporated (SCVI), at CHANGELS. Sa kanilang sama-samang pagkilos, muling naipamalas ang diwa ng bayanihan at malasakit sa kapwa.

Higit pa sa isang blood donation activity, ang “Dugong Alay, Dugtong Buhay” ay naging simbolo ng pagkakaisa, malasakit, at paninindigan ng CAGELCO II sa patuloy na paglilingkod sa komunidad. Sa bawat dugong naibahagi, may panibagong pag-asang naipagkakaloob at may buhay na maaaring mailigtas.

Taos-pusong nagpapasalamat ang CAGELCO II sa lahat ng ating blood donors, partner organizations, volunteers, at sa Philippine Red Cross–Cagayan Chapter sa kanilang pakikiisa sa ating layunin.